الجمعة، نوفمبر ١٦، ٢٠٠٧

عيون النيل

دي التدوينة المسموعة الثانية..

واضح اني بقيت باستسهل التدوينات المسموعة لما مالاقيش حاجة اكتبها..

عموما يارب تعجبكوا المرة دي..

دي اغنية اسمها " عيون النيل"..كلمات الصديقة العزيزة نها عاطف

وتلحيني..

ومع الاسف من غنائي كمان..

طبعا ارجو ان الناس تتجاهل عذوبة صوت هذا الكروان المغرد - اللي هو انا- وتركز في الكلام واللحن

وان شاء الله اذا الاغنية عجبتكوا هاندورلها علي حد بيعرف يغني بجد عشان يغنيها


كلمات الاغنية/القصيدة لسهولة المتابعة:

عيون النيل..بتبكي

م القناطر..سد

عالي بكاك يا نيل..

لكن ما سامعه حد..

*****

واحدة تولول قوي

بمرارة وبحرقة

تجري عليك..يا نيل

و الناس يحوشوها

تجري عليك ..يا نيل

بقوة و بجرأة

ولو تضيع وسطهم

مش راح يلاقوها

و بسرعة لحقت رمت

روحها في احضانك

و انت العزيز الولا

فارس علي حصانك

قالوا عليها غريق

قالوا عليك غدار

مع انك انت الدار

انت اللي آويها

انت الوحيد يا نيل

اللي بتبكيها

عماله تبكي عينيك

م القناطر سد

عالي بكاك يا نيل

لكن ما سامعه حد

****

و تعدي مركب

ماشية..بتأني

فيها ناس..رايقة

و بتغني

بوشوشهم البيضا

وشعورهم الصفرا

جايين يبصوا عليك

وقرفانين منك

دمعك ما يعجبهم

نيل القزايز آه

لكن انت يا ولداه

مايعملولك خاطر

تاني هاتبكي عينيك

م القناطر سد

عالي بكاك يا نيل

لكن ما سامعه حد

****

جاي من بعيد يا نيل

من كينيا والسودان

ومخبي عنا دمعك

مواويل هوا واحزان

جاي ومادد ايد

لحبيب مالوش احضان

واقف مامدش ايد

للطيب الراجع

وفر بكاك يا نيل

وفر بكاك يانيل

علشان ماحدش سامع

هناك ٥ تعليقات:

Lemonada يقول...

اول تعليق
هههههههههههههههههههههههههههه
بجد لحن جميل
وكلمات جميلة جدا
الي عجبني الكلمات مش زي كلمات الاغاني الي متكررة
او بتكون جزء واحد وتنعاد مليون مرة
واضح ان في تعب ووقت حتى الكلمات بقت بالشكل دة
بخصوص الصوب بتاع حضرتك
احم احم
احم احم
بلاش يا يامن وخلينا اصحاب
هو بس شوية تدريب وانت حتبقى تمام
اصلك لما تكون عاوز ترفع صوتك في الاغنية الصوت يبقى شوية ها
شوية عاوز يتزبط
تحياتي ليكم وربنا معاكم
:)

Hamed يقول...

أنا مش فاهم بدال سيادتك بطلت عزف على العود للأبد و أقلعت عن التلحين نهائياً حاططلنا الأغنية على المدونة ليه .. أمراض يا أخي !

حسن أمين يقول...

dear missed Yamen
hope to be fine.. i'm awfully sorry about not being showing up for a while .. i'm in a complete mess exams .. interviews .. work ..illness..
its driving me mad.. excucuse your brother .. i'm not that bastard beleive me ..
till i see u .. god bless u.
hasan

اسامة يس يقول...

بإذن الله لي عودة .. لكن في عجالة الآية
( والقيت عليك محبة مني ولتصنع على عيني..) في رأس المدونة نسيت الواو في ولتصنع ...
سورة طه الاية39
ارجو سرعة تغيرها ولكم خالص الود

yamen يقول...

الصديقةالعزيزة ليمو..
اشكرك علي رايك في اللحن والكلام اللي طبعا هو اجمل ما في الموضوع
و انا مقدر ليكي مجاملتك في موضوع صوتي
يابنتي قولي براحتك انا مش هازعل
ده مش عايز تدريب..ده عايز الحرق.
:)

اشوفك علي خير

الحبيب حامد:
:)
ماشي يا عم..انت الوحيد اللي عارف اللي فيها
وانت فاهم بقه
:)
تحياتي ليك ولحلموس

الصديق الانسان حسن امين:
انا لم اظن فيك سوءا ابدا يا عزيزي
انا مقدر ظروفك اللي هي ماتختلفش كتير عن ظروفي
الله يكون في عونا جميعا..
تحياتي وهاشوفك قريبا ان شاء الله

اسامة:
تشرف وتنور في اي وقت
و بالنسبة لموضوع الواو الناقصة
انا لاحظتها بالفعل لكني مع الاسف في ورطة لان الصديق اللي عملهالي في امتحانات ومشغول و لا يستطيع ان يصلحها الان
و لكن بمجرد ان يجد لي وقتا فساصلحها ان شاء الله
اشكرك يا عزيزي علي اهتمامك
تحياتي و في انتظار زيارتك القادمة