تاج الجزيرة
دي تدبيسة حلوة من المدونة العزيزة "شهيدة"..التاج طوييل جدا..فندخل في الموضوع علي طول
احب شخص لقلبك في الدنيا؟
بصراحة مش عارف..بس ناس كتيرة بحبها
انسان مستعد تضحي بحياتك عشانه؟
طبعا احنا عايزين الصراحة...لحد دلوقتي مفيش
انسان كرهته لدرجة الجنون وتمنيت لو تمسك سكينة وتنقض عليه وتغرزها في قلبه تقتله وتقف تبص لجثته و تشفي غليل قلبك؟
يا ساتر..ايه ده كله..
هو علي المستوي الشخصي مفيش لان لو في حد كده انا مش هاعرفه اصلا..
بس انا باحس بالاحساس ده لما باشوف ضباط الشرطة في الشارع وهما مبلطجين علي الناس وفاكرين ان البلد دي بتاعة اللي جابوهم
ربنا يورينا فيهم يوم
ما هو اسم اجمل كتاب كتبه بشر قراته ومحتفظ به حتي الان؟
كتاب صحة العلاقات للدكتور اوسم وصفي
اسم كتاب كتبه بشر انت متعلق بيه وبتقراه كل فترة
نفس الكتاب السابق
اهم جهاز منزلي انت متعلق بيه او بتستخدمه كتير؟
الكمبيوتر اكيد
شئ تحس بالراحة النفسية عندما تنظر اليه؟
النيل من ساقية عبد المنعم الصاوي
مكان تحس فيه بالحنين الي شئ لا تدري ما هو وذكريات جارفة الي لاشئ؟
دار الاوبرا المصرية ليا فيها ذكريات كتييييير.. وفينك يا حامد وفينك يا ابن مر
مكان تحس بالراحة عندما تدخله؟
الاوبرا والساقية والمسجد
اجمل مدينة زرتها في مصر؟
اسكندرية و الاقصر واسوان
اجمل مكان طبيعي رايته داخل مصر؟
البحر الاحمر في العين السخنة النيل في الساقية زي ما قلت
شخصية كارتونية بتحبها؟
ماهر في مازنجر و سندباد
نوع هاتفك المحمول؟
نوكيا بس ماعرفش اسم الموديل كام
سرعة بروسيسور جهازك؟
ماعرفش
حجم ذاكرة هارد جهازك؟
ماعرفش برضه
المساحة التي تشغلها المواد الاسلامية علي جهازك؟
قيلة مش كبيرة
نفس المساحة السالف ذكرها في قلبك؟
الله اعلم
اهم هدف انت واضعه لحياتك دلوقتي؟
اني اكون زي ما انا عايز
و اعرف ايه اللي انا عايزه اصلا
مواصفات فتاة الاحلام بالنسبة لك؟
مفيش مواصفات بس هي لما تيجي انا هاعرفها من غير اوصاف
صف شعورك لما بتسمع كلمة مصر؟
بافتكر اهلي واصحابي وكل ذكرياتي هنا و افكر قد ايه انا كنت اهبل لما كنت بافكر اسيب مصر واسافر بره
شعورك لما بتسمع كلام عن اليهود؟
باتكسف من نفسي ومن جيلي ازاي احنا نايمين في العسل و هما في نفس الوقت بيشتغلوا كويس جدا وبيتعبوا عشان تحقيق اهدافهم وبافتكر الخلط الشائع بين اليهود والصهاينة
شعورك لما بتشوف ضابط شرطة؟
راجع السؤال بتاع الكراهية السكينة و الكلام ده
شعورك لما بتشوف الكناس العجوز في الشارع؟
باحس قد ايه البشر بسطاء وطيبين حتي لو الشر بدا منهم وباقول ان الراجل البسيط ده هايدخل الجنة ان شاء الله
لون الجورب المفضل؟
الابيض
احساسك اذا داست قدمك في الطريق علي مخلفات حيوان؟
يع
افكارك تجاه شاب ماشي في الطريق يلبس جلابية بيضا قصيرة وعمامة وله لحية وبجيبه السواك؟
باقول لا اله الا الله
احساس يراودك في اشارة مرور مغلقة بسبب مسئول كبير؟
باقول حسبي الله ونعم الوكيل
يارب يعمل حادثة
امرر التاج ده لميييييين؟
هناك ٣٥ تعليقًا:
وانت كمان فى نفس ذات الوقت
انت وشهيده
بتدبسونى فى التاج
ماشى يا عم
:)
وبمناسبة الاوبرا
فين الاتفقيات والمباحثات اللى قلنا هنعملها
لسه بردو ابن مرّ مكلمكش
؟
يلا اشوفك على خير
لان محدش مرر ليا تاج قبل كده فمجربتش اعلق اقول ايه انما ردودك هادية وبسيطة عقبال التاج التاني والتالت
من خلال التاج ده قدرنا نعرف بعض الحاجات عنك وعن شخصيتك وتفاعلك مع الوسط المحيط
ولو انك كنت ديبلوماسى فى بعض الاجابات
وكل تاج وانتى طيب
تحياتى
انا زعلانة منك عشان مش مررتلى التاج
لانى بجد هموت عليه
زعلاااااانة واى
وعلى فكرة بقى
انا بحب ظباط الشرطة
السلطانية ، يا ترى انت فين يا مرزوق
الحمد لله انك ممررتليش التاج
عشان كنت حعك كتير قوي ي ي ي
هههههههه
تحياتي
بجد أسعدتني انك فكرني ومررتلي التاج
منتظر أشوف قبل ما أسافر يا جميل
ربنا يسعد أوقاتك
حقيقى فنان بجد
اجاباتك فيها مزيكا
و كانت على نسبة عالية من الثقافة و الرقى و الدبلوماسية
يامن:
انتا اشتغلت في السلك الديبلوماسي قبل كدة؟
اجابات ما شاء الله
اللهم صلي على كامل النور
اللهم لا حسد
اللهم لا حسد
اجابات مقتضبة و بسيطة بس حاجة توحفة
تحياتي يا صديق
سلام يامن
أولا انا مبسوطة جدا انك رديت على التاج
تانيا أجوبتك حلوة أوي
ويعني شوية شوية حنتعرف على شخصيتك اللي واضح انها شخصية فنان مرهف الأحاسيس وبنفس الوقت مفكر عميق
تحياتي ليك
اجاباتك قربتني اكثر من شخصيتك الجميلة
تحياتي
إجاباتك منطقية جدا
وجميلة
تحياتي
أجابات جميلة ولذيذة
تحياتى
yamen al gamil ana mabsota bik awi rabena yekrmak ya rab we ashofak kol youm a7sn mn ali abloh al blog ba2a helw awi we bad2na neb2a noshtah shewia ya reet ba2a 7aba kman 3lashan nekon a7sn
al mohem mosh hatawil 3lik wla aw eni mn ha2i atwil zi mana 3awza enta 3aref dah al blog beta3i bardoh wla aih ra2iak??
bos ba2a ya sidi fekrt al tag dih helwa awi bet3rf al nas bik aktr 7'ososan al nas ali mosh te3rfak hawel tektb fiha keteer 3lashan te3rf al nas 3lik we ye3rfoh yamen al ensan ba3d ma3rfoh yamen al fanan tab3an ana kont 3arfa nos al egabat dih bas bardoh 3reft hagat gededa bas fi so2al 3agbni awi ana nefsi fih mn zaman tab3an enta 3arfoh wla aih ya sadiki al sadok??
we a7'eran ya reet al nas ali biglha tag kedh teb3toh le yamen 3lashan te3rfoh aktr .....
salam ya fanan
الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...
البوست بعنوان
أن تكون أبو الفـتوح شوشة
حملة الإفراج عن شيخ المجـاهدين :
في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...
أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...
أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..
أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...
أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...
أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...
أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...
أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...
أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...
أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...
أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...
الروابط :
مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html
مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm
تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1
ملف pdf عن جهاد شيخ المجاهدين المصريين في فلسطين
http://www.fm-m.com/2003/aug2003/pdf/51.pdf
جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
جاري تدعيم الحملة بتقرير جريدة الوفد عن شيخ المجاهدين بتاريخ14/5/2007
اصدقائي المدونين الكرام
اولا اشكركم جميعا جزيل الشكر علي تعليقاتكم الجميلة واعتذر لكم عن التاخير في الرد و لكن ذلك كان بسبب انشغالي بالعمل في الفترة الاخيرة
تحياتي لكم جميعا
rr:
دي تدبسية من ناحيتين يعني مالكيش اي حجة بعد كده..
:)
تاني حاجة بخصوص الاوبرا احب اطمنك ان المباحثات في الخطة ومش منسية ومن كام يوم كنت مع حامد واتكلمنا في الموضوع ده و ان شاء الله لما اشوفك هابقي اقولك اخر الاخبار
تحياتي
senbad:
اولا يا استاذ سندباد احب اقولك اني باتبسط لما ادخل والاقي تعليقك في الاول..بجد
تاني حاجة تاجك اللي جاي انا اللي ان شاء الله هادبسك فيه انت و الوردة السوداء في يوم واحد
:)
اشوفك علي خير يا استاذ سندباد
تحياتي
كلام لوجيك:
و انت طيب يا باشا
في انتظار تاجك يا عزيزي
تحياتي
الوردة السوداء:
واحنا ياستي مانقدرش علي زعلك ابدا
انا كنت ناوي امررلك التاج ده بس انا اولا اتاخرت جدا و ثانيا عرفت ان رانيا مررتهولك
بس ليكي عليا ياستي ان شاء الله التاج الجاي اول حد هايتدبس فيه هايكون انتي
تمام كده..صافي يا لبن؟
لسه بتحبي ظباط الشرطة برضه؟
:)
تحياتي
Mohamed A. Ghaffar:
انت في بحر الظلمااااااااات
ها ها ها ها ها
:)
تحياتي
اشرف حمدي:
انا بصراحة كنت هامررهولك بس انا عارف ان انت لسه خارج من تاج قريب من عند وينكي فمارضيتش اغتت عليك تاني
لانه علي راي المثل خبطتتي في الراس توجع
:)
ولا ايه يا معلم؟
تحياتي
حورس:
انا كان نفسي اشوفك قبل ما تسافر بس مفيش مشكلة..
ملحوقة ان شاء الله
توصل بالسلامة ان شاء الله
وابقي قوللي كيدير الاحوال ديال المغاربة؟
صافي؟
:)
سلام يا باشا وفي انتظارك
احمد مختار عاشور:
يا باشا تسلم عيونك ويسلم لسانك الجميل
ده انت اللي فنان والله وكلامك كله ذوق
تحياتي يا عزيزي
تصدق انا مش هاخد اي تاج من عندك
كدا امه لا اله ال الله تسأل عليا وانت لا يا يامن
تصدق عيب بجد
والله زعلت
علشان انت عارف انك اخويا
يالهوي
اخويا ومسألش عليا
متؤلش مشغول
والله فيه ناس عندها متحانات ودخلت علشاني
تصدق بجد عيب كدا جدا
افتح بقك هخلعلك ضرس العقل حالا
ومن غير بنج
اوع تزعل دا عتاب محبه
يارب تكون بالف خير
وانا الحمد لله كويسه
وكلو تمامه
تحياتي ليك من الكويت
إخى يامن
ربنا يكتر من تاجاتك و يكبرو وتربهم فى عزك
كويس أدينا عرفنا شوية معلومات عنك
هاهاهاها
سلام
محمد فوزي ال ربيع:
الله صلي عليك يا نبي..
:)
ربنا مايحرمنيش من ذوقك و زيارتك يا صديقي
و تشكر علي كلامك الجميل
تحياتي
شهيدة:
انا اللي متشكر بجد انك مررتيلي التاج
بحد اتبسطت منه قوي
ثانيا اشكرك جزيل الشكر علي مجاملتك الرقيقة
وان شاء الله هاردلك التدبيسة دي قريب
:)
تحياتي يا اختي العزيزة
صاحب البوابة:
اشكرك يا عزيزي و التقارب ده شرف ليا انا
يا رب يكون في تقارب دايما ونتعرف علي بعض بشكل اوضح
تحياتي يا عزيزي صاحب البوابة
shermen:
اشكرك يا عزيزتي
تحياتي
bos bos:
ربنا يخليكي يارب..ده بس من ذوقك
تحياتي
الصديقة الصدوقة دكتور ميمو:
طبعا من حقك تطولي زي ما انتي عايزة..
و لو حتي كلامي ماعجبكيش تقدري تدخلي وتمسحيه وتحطي غيره
انا اقدر اتكلم؟
:)
طبعا عارف السؤال..
و لا ايه رايك
:)
دايما منورة يا ميمو وربنا معاكي
اشوفك علي خير يا صديقتي الصدوقة
تحياتي
جهينة:
اولا الف حمد الله علي السلامة
ثانيا..
حقك علي دماغي من فوق يا جهينة..
انتي كده يبقي ليكي عندي حق عرب..
:)
بجد حقك عليا وماتزعليش
وانا عارف ان عتابك ده عتاب محبة واخوة مش عتاب زعل عشان اللي بينا اكبر من الحاجات دي
بس معلش سامحيني و الله ظروف الشغل والسفر انا حتي مادخلتش علي المدونة عشان ارد علي الناس الا امبارح و حتي مالحقتش
بس انا عارف ان دي حجة البليد
اهم حاجة ان انتي الحمد لله وصلتي بالسلامة
يارب تكوني مبسوطة وماتغيبيش علينا
تحياتي و اعتذاراتي
قائد:
تشكر يا عزيزي ومانجيلكش في حاجة وحشة ابدا يا رب
:)
شرفت و نورت يا عزيزي
تحياتي
ردردك بسيطه ونابعه من شخصيتك
لكن انا اخدت بالى من بعض التشابهات اللى بينا
حب الساقيه والأوبرا ومنظر النيل من الساقيه
وانا مابنفكرش نسيب مصر
كره الشرطه وبنقول يع لو دسنا على مخلفات حيوان
انا حاسه فى تلات اربع الاسئله انى انا اللى بجاوب لدرجه ان بعضها كنت باقوله قبل ماقراه والاقى نفس الاجابات
صدفه سعيده يافندم
عزيزي يامن
اين انت منذ فترة
مررت لأقرأ لك كما تعودت
فلم أجد لك جديداً
تشرفنا يا افندم
جميل ان الواحد يلاقي حد شبهه
انا سعيد بجد بزيارتك ليا
واشوفك ان شاء الله في الاوبرا او علي شط النيل في الساقية في الكافيتيريا الجديدة اللي فوق
الترابيزة اللي علي ا لشمال اللي ورا الشجرة
سته كيلو سمك وجمبري
:)
شرفتي يا وينكي بجد
تحياتي
العزيز صاحب البوابة
اسف لاني تاخرت عليك
وبجد سعيد بمرورك الدائم عندي
اعذرني معلش
الفترة دي عندي ضغط شغل شوية
اوعدك بالجديد قريبا ان شاء الله
دايما مشرفني ومنورني
مبروك التاج
التاج للجدعان :)
و معلش زيارة تأخرت نسبيا
انا علقت علي فكرة علي بوست شيطان رقيق لانه أثر فيا
و المدونة كلها بصراحة جميلة
تم أفتتاح العدد الأول من مجلة نفسنا
نتمنى منكم زيارتنا
اجابتك جميلة اوى ومدونة رائعة تحياتى
رد بسيط وجميل جدا وشبيه ليا فى حاجات كتير
بس انا عجبني كتير ردودك دي
صف شعورك لما بتسمع كلمة مصر؟
بافتكر اهلي واصحابي وكل ذكرياتي هنا و افكر قد ايه انا كنت اهبل لما كنت بافكر اسيب مصر واسافر بره
شعورك لما بتسمع كلام عن اليهود؟
باتكسف من نفسي ومن جيلي ازاي احنا نايمين في العسل و هما في نفس الوقت بيشتغلوا كويس جدا وبيتعبوا عشان تحقيق اهدافهم وبافتكر الخلط الشائع بين اليهود والصهاينة
شعورك لما بتشوف الكناس العجوز في الشارع؟
باحس قد ايه البشر بسطاء وطيبين حتي لو الشر بدا منهم وباقول ان الراجل البسيط ده هايدخل الجنة ان شاء الله
وان شاء الله هيبقي ليا زيارات تانيه لمدونتك :)
تاج جميل حقا
عزيزي يامن ..
بغض النظر عن كل الإجابات المراوغة بتاعتك .. وقفت كتير عند إجابة واحدة شايفها تدعو للتأمل ..
"""مفيش مواصفات بس هي لما تيجي انا هاعرفها من غير اوصاف"""
يا ترى انته متأكد من ده بجد ؟ و يا ترى عمرك مفكرت - أو على الأقل شكيت - إنها تكون قابلتك أكتر من مرّة و انته مخدتش بالك أو خدت بالك و صهينت في انتظار "فتاة أحلام قوي" أكتر من فتاة الأحلام ده ؟!
مجرد سؤال برئ بلا أي أغراض شريرة !
ههههههههههههههههه
تاج لذيذ وردة دمها خفيف
تحياتي
مش صريح خااااااااااالص
او انك مش عارف انت عاوز اي
يا عم ما فيش احلى من الصراحة
حاخد من كلام آل ربيع :
هو انت اشتغلت في في السلك الدبلوماسي قبل كدة؟
و بعدين فينك ناسينا
نورنا بزيارة
مبروك عليك التاج
بس مش عارفة كنت حاسة انك بتقصر في الاجابات
بس انت اخبارك ايه
نمنماية:
الله يبارك فيكي وعقبالك
والله انا اللي اسف علي التاخير في الرد بجد
شرفنيي و الله..وانا قريت تعلبقك علي شيطان رقيق و رديت عليكي هناك
ومتشكر علي رايك في مدونتي المتواضعة
اتمني ان تكرري الزيارة دائما
تحياتي
نفسنا
الف الف مبروك وانا زرت المجلة فور معرفتي بافتتاحها
تحياتي
الغزالي:
اشكرك يا عزيزي ونورتني في اول زيارة ليك عندي ويارب تتكرر تاني وتالت
تحياتي
شمس:
يارب دايما كده مشرفني بزيارتك
و انا مبسوط ان الاجابات دي بالذات عجبتك
تحياتي ياعزيزي
عمرو غريب:
اشكرك يا عزيزي الرياضي
تحياتي وكرر الزيارة دائما
الحبيب حامد:
طبعا السؤال مش برئ ولا حاجة وانت مش محتاج ارد عليك هنا عشان احنا اتكلمنا قبل كده في الحكاية دي و بعدين انت عارف اكتر من اي حاجة هقولهالك
اشوفك علي خير يا صديقي
احمد العربي:
ربنا يخليك يا باشا
شرفت ونورت
تحياتي
:ليمونادة
الحقيقة الاتنين
مش صريح ومش عارف انا عاوز ايه
بس خليها في سرك و ماتقوليش لحد
وانا ماشتغلتش في السلك الدبلوماسي قبل كده
بس ممكن اشتغل لو عندك ليا شغلانة هناك
:)
واسف علي التقصير في زيارتك بس و الله كنت الفترة اللي فاتت كان عندي ضغط شغل جامد وماكنتش بادخل علي النت خالص
عموما انا في طريقي اليكي دلوقتي حالا
تحياتي ونورتيني
سمراء النيل:
الله يبارك فيكي
انا ماكنتش باقصر ولا حاجة بس حبيت اقول المختصر المفيد عشان انا عارف ان الناس بتزهق من الكلام الكتير
وانا الحمد لله بخير و الله
يسلم سؤالك
تحياتي
إرسال تعليق